ಕೊಳಲನೂದಿದ

ಕಥೆ : ಕೊಳಲನೂದಿದ
ಪುಸ್ತಕ : ಎಚ್ಚರದ ಕನಸು
ಲೇಖಕರು : ವೀಣಾ ಬನ್ನಂಜೆ

ಹೌದಪ್ಪಾ ಹೌದೋ ನೀನೇ ದೇವರ...
ನಿಂದ ನೀ ತಿಳಿದರ ನಿನಗಿಲ್ಲೋ ದೂರ ...
ಷರೀಫರ  ಈ ಹಾಡು ಇವತ್ತು ಯಾಕೋ ಬಹಳ ನೆನಪಾಗ್ತಿದೆ .

ನಿದ್ದಿಯೊಳಗೂ ಸದಾ ಎಚ್ಚರವಿರಬೇಕು
ಸೆರೆ ಕುಡಿಯದೇ ನಶೆ ಹತ್ತಿರಬೇಕು
ಅಂತ ಮುಂದುವರಿಯುತ್ತೆ . ಎಚ್ಚರದಲ್ಲಿದ್ದಾಗ ಕನಸು ಬೀಳದು.  ಬಿದ್ದರೂ ಅದು ಕನಸೇ ಅಲ್ಲ.

ಇಂದು ವೀಣಾ ಬನ್ನಂಜೆಯವರ ಕಥಾ ಸಂಕಲನ " ಎಚ್ಚರದ ಕನಸು " ಓದಿ ಮುಗಿಸಿದೆ. ಒಂದೇ ಓದಿಗೆ ದಕ್ಕದ ಬರಹಗಳವು. ಆದರೆ ಒಂದೊಂದು ಬಾರಿ ಓದಿದಾಗಲೂ ಸಹ ಒಂದೊಂದು ಹೊಳಹು ನೀಡಬಲ್ಲ ಕಥೆಗಳು .

ಕೇವಲ ಕಥೆ ಅನ್ನುವುದಾ ಇದಕ್ಕೆ ...? ಒಮ್ಮೊಮ್ಮೆ ನನ್ನದೇ ಮನದ ಬಿಕ್ಕಳಿಕೆ ,
ನಾನು ಕಲ್ಪಿಸಿಕೊಂಡ  ಭಾವನೆಗಳ ಹುಚ್ಚು ಲೋಕವ ಮೀರಿ ಹೊರಬರುವ ತುಡಿತ , ಕನವರಿಕೆಗಳು ಒಂದೇ ಬಾರಿಗೆ ವ್ಯಾಮೋಹದ ಹುಚ್ಚು ಹೊಳೆಯಲ್ಲಿ ತೇಲಿಹೋಗುವಾಗ ಸಿಕ್ಕ ಆಸರೆಯಂತಾದ ಹುಲ್ಲುಕಡ್ಡಿಯಂತೆ .
ನನ್ನನು ನಾನು ಕಲ್ಪಿಸಿಕೊಂಡ ಊಹಾಪ್ರಪಂಚ ಎಷ್ಟು ಸೂಕ್ಷ್ಮ , ಥೇಟ್ ಗಾಜಿನಂತೆ .ಅದನ್ನು ಒಡೆಯುವ ಕಲ್ಲಿನಂತೆ ಈ ಬರಹ ಎಂದರೆ ತಪ್ಪಾಗಲಿಕ್ಕಿಲ್ಲ.
         ಇಲ್ಲಿ ಬರುವ ನಿರೂಪಕಿಯ ಅಪ್ಪ , ಅವಳ ಗುರು ,  ಅವಳ ಆತ್ಮಸಖ , ಎಲ್ಲವೂ ಆದ ಅವನು ಹೇಳಿದ ಮಾತುಗಳು ಇನ್ನೂ ಮನದಲ್ಲಿ ಆವರಿಸುತಿದೆ.
   "  ಮಗೂ, ನಿನ್ನ ದುರ್ಬಲ ಕೋಶದೊಳಗೊಂದು ಗಟ್ಟಿ ವಜ್ರದ ಕೂಸಿದೆ. ಆ ಕೋಶ ಹರಿಯುವುದಷ್ಟೇ ನನ್ನ ಕೆಲಸ ."
        ಒಮ್ಮೆ ಅಂತರ್ಮನನ ಮಾಡಿಕೊಂಡರೆ ನಾವೆಲ್ಲರೂ ಆ ಗಟ್ಟಿ ವಜ್ರದ ಕೂಸನ್ನೇ ಹುಡುಕುತ್ತಾ ಜೀವನ ಕಳೆಯುತ್ತೇವೆ . ಅದು ನಮ್ಮೊಳಗೆ ಇರುವುದು ಮರೆತೆ ಹೋಗಿರುತ್ತದೆ.

ಕವಲೊಡೆದ ಹಾದಿಗಳು , ಕವಿದಿಹುದು ಕತ್ತಲೆಯು , ಮನವೇ ಬಲುಜೋಕೆ . ಎಂದು ಎಚ್ಚರಿಸುತ್ತಲೇ ಸಾಗುತ್ತದೆ ಕಥೆ .

ಅಜ್ಞಾನದ ಪೊರೆಯೊಳಗೆ ಸಿಲುಕಿರುವ  ಅಂತರ್ಶಕ್ತಿಯನ್ನು , ಅಂತರಚೇತನವನು ಬಡಿದೆಬ್ಬಿಸುವ ಕೂಗು ಅದು. ಆ ಅಜ್ಞಾನದ ಪೊರೆ ಹರಿಯುವುದು ತನಗಿಂತ ಭಿನ್ನ ನಾದವನಿಗೆ ಮಾತ್ರ ಸಾಧ್ಯ ಅನ್ನೋದು ಇಲ್ಲಿ ಅಭಿವ್ಯಕ್ತಗೊಂಡಿದೆ ‌.

ಕೃಷ್ಣನಿಂದ ಮೊದಲು ದೇಹಸುಖಕೆ ಮನಸು ಸ್ಪಂದಿಸಿದರೂ ಸಹ , ಸ್ಪಂದಿಸಬೇಕಾದದ್ದು ಮನಸು ದೇಹವಲ್ಲ. ಎಂದು ಎಚ್ಚರಿಸುತ್ತಾನೆ ‌ .
ಅವಳ ಮಡಿಲ ಮಗುವಾಗಿ , ಕಾಳಜಿ ತೋರುವ  ತಂದೆಯಾಗಿ , ಅವಳ ಸಖನಾಗಿ , ಕೊನೆಗೆ ಆತ್ಮಸಖನೂ ಆಗಿಬಿಡುತ್ತಾನೆ .

ಸೋತು ಬಂದೆನೋ ಗುರುವೇ ನಿನ್ನ ಬಳಿಗೇ
ಸೋತ ಜೀವವನಾತುಕೋ ಒಂದು  ಘಳಿಗೆ
ಎನ್ನುತಾ ಆತ್ಮ ಸಮರ್ಪಣೆ ಮಾಡುತ್ತಾಳೆ .

ಮೊದಲು ಹೊರಗಿರುವವರಿಗೆ ನಿನ್ನನು ತೋರುವುದನು ನಿಲ್ಲಿಸು , ತೋರಿಕೆ ಅವಸಾನಕೆ ಮೂಲ ಅಂತ  ಕೃಷ್ಣ ಅವಳಿಗೆ ಹೇಳುವ ಮಾತುಗಳು ಪ್ರತಿಯೊಬ್ಬ ಓದುಗನಿಗೂ ಹೇಳಿದಂತೆ ಆಗುತ್ತದೆ.

ಹೇಳಬೇಕಾದದ್ದನ್ನು ಬೇರೆಯದೇ ರೀತಿಯಲ್ಲಿ ಹೇಳುತ್ತಾ ಹೋಗಿ , ಅದನ್ನು ಅರ್ಥದ ಪರಿಧಿಗೆ ಸಿಲುಕಿಸದಂತಹ ಕಥೆ ಕೊಳಲನೂದಿದ .

ಕಥೆ ಕಟ್ಟುವ ಶೈಲಿ ಬಹು ವಿಭಿನ್ನ . ಪದಗಳೊಳಗೆ ಗೂಢಾರ್ಥವನಿಟ್ಟು ಬರೆದಿರುವುದರಿಂದ ಹೊಸ ಓದುಗನಿಗೆ ತಕ್ಷಣ ಅರ್ಥವಾಗುವುದಿಲ್ಲ. ಕುವೆಂಪುರವರ ಥರ ಸ್ವಪ್ನಾ ಪ್ರಪಂಚವನ್ನು ಸಮರ್ಥವಾಗಿ ಆಧ್ಯಾತ್ಮಿಕ , ವೈಜ್ಞಾನಿಕ , ಕಾವ್ಯಗಳ ದಿವ್ಯ ಸಂಗಮವನ್ನಾಗಿ ಮಾಡಿದ್ದಾರೆ . ವೀಣಾ ಬನ್ನಂಜೆಯವರು.
ಈ ಓದಿನ ಹ್ಯಾಂಗೋವರ್ ನಿಂದ ಹೊರ ಬಂದಿಲ್ಲ ಇನ್ನೂ............